എന്നുടെ സഖിയായി മരുവിടാ -
നന്യരാൽ നിന്ദിതനായിത്തീരേണമോ?
ആരും തുണയില്ലാതെ വലയാ -
തഗതിയാമെന്നെ കരുതുക തന്നെ

നന്മ ചെയ്തു നടന്ന പാദങ്ങളിൽ
വൻ മുറിവേകിടുന്നാണികൾ മുനയാൽ
എൻ നടപ്പു നന്നാകുവതിന്നാ -
യൊന്നുമില്ലേയന്യമാർഗ്ഗമിതെന്യേ!

ആണികൾ നിജപാണി യുഗങ്ങളെ
ശോണിതപൂരിതമാക്കി കാണുന്നിതാ!
എൻ ക്രിയകളിൻ വൻകലുഷത
നീക്കുകയാണിതു നോക്കിയ ഹേതു

മുൾമുടിയതുമൂലം മുറിഞ്ഞിതാ!
തൻമുഖത്തൂടൊഴുകുന്നു തങ്കനിണം
എൻ നിനവിലെ തിന്മയഖിലം
ശിരസ്സിലേറ്റിടുവാൻ മനസ്സലിഞ്ഞോനേ

മാ മരക്കുരിശ്ശായി ബലിപീഠം
വാനവനീശ്വരനായി യാഗമൃഗം
മരത്തിൽ തൂങ്ങുവോൻ ശപിക്കപ്പെട്ടവൻ
ലിഖിതമിതീവിധമായി നിർവ്വാദം