ഹാ! കലങ്ങൾക്കിടയിൽ നീ
ആകുലയായ് കിടന്നാലും
നാകനാഥൻ കടാക്ഷിക്കും
നിന്റെ മേൽ - കാന്തൻ
പ്രേമരസമതു ഭവതിയുടെ മനമാശു
തന്നിലൊഴിക്കവേ - പര -
മാത്മചൈതന്യം ലഭിക്കുമാകയാൽ - നീയും
വാനലോകേ പറന്നേറും പ്രാവുപോൽ

ബാലസൂര്യകാന്തികോലും
ചേലെഴും ചിറകിനാൽ നീ
മേലുലകം കടക്കുന്ന കാഴ്ചയെ - പോരാ
കനകമണിവൊരുഗണിക സുതരൊടു
സഹിതമാഴിയിലാണിടും തവ
ബാബിലോൺ ശിക്ഷയാം
ഘോരവീഴ്ചയെ - കാണ്മാൻ
ബാലനിവന്നേകണം നിൻ വേഴ്ചയെ

ആയിരമായിരം കോടി
വാനഗോളങ്ങളെ താണ്ടി
പ്പോയിടും നിന്മാർഗ്ഗമൂഹിക്കാവതോ?
കാണും ഗഗനതലമതു മനുജഗണനയു -
മതിശയിച്ചുയരും വിധൌ - തവ
ഭാഗ്യമഹിമയെ വാഴ്ത്താനാവതോ? സൗഖ്യം
ലേശമെങ്കിലുമുരപ്പാൻ നാവിതോ?

വെണ്മയും ചുമപ്പു പച്ച
മഞ്ഞ നീലം ധൂമ്രമെന്നീ
വർണ്ണഭേദങ്ങളാൽ നിഴൽ
നൽകിയേ ജ്യോതിർ
മണ്ഡലങ്ങളിലമരുമവരുടെ
വന്ദനം ജയഘോഷമെന്നിവ
മണ്ഡനമായ് തന്നു നിനക്കംബികേ! വാനം
നിന്നെയുപചരിച്ചിടും ധാർമ്മികേ!

ഹാ! മണവറയ്ക്കടത്തു
നീയണയും സമയത്തു
ശ്രീമഹാരാജ്ഞിയേ!
നിന്നെക്കാണുവാൻ - സ്വർഗ്ഗ
കാമിനീഗണമമിതകുതുകമൊ -
ടാദരാലരികേ വരും തവ
കൈകളെ കാന്തൻ പിടിക്കും
മോദവാൻ നിത്യ
സ്നേഹഭവനത്തിനുളളിൽ പൂകുവാൻ

നിന്മുഖത്തുനിന്നു തൂകും
നന്മധുപൂരത്തിലംബേ!
മുങ്ങി ലയിക്കുന്നു
ദിവ്യജ്ഞാനികൾ - നിന്റെ
നൻമൊഴിക്കരികണയുവതിനൊരു
നവ്യമായ സയൻസുമില്ലതു
സമ്മതിക്കുന്നജ്ഞരല്ലാ പ്രാണികൾ തെല്ലു -
മുണ്മയറിയുന്നതില്ലേ മാനികൾ

നിൻ മഹിമയോതുവതിന്നി -
ന്നരന്നു സാദ്ധ്യമല്ലേ
പൊന്നുപുതുവാനഭൂമി വന്നിടും - അതേ
മണ്ണിൽ വീണു മറഞ്ഞുപോയവർ
പിന്നെയും പുതുതാമുടൽ ധരി -
ച്ചുന്നതജീവനെയാണ്ടു നിന്നിടും നാളിൽ
നിന്നിലടിയൻ ലയിച്ചുചേർന്നിടും

സത്യമാതാവായെനിക്കിങ്ങുത്തമേ
നീ മാത്രമല്ലോ
നിത്യനേശുക്രിസ്തുരാജ -
നെന്നുമേ സർവ്വ
ദുഃഖവും നിജതൃക്കടാക്ഷമതൊന്നു
കൊണ്ടകലത്തകറ്റിടു -
മുൾക്കനിവേറും പിതാവാണിന്നുമേ മമ
സ്വർഗ്ഗപിതാവിന്റെ നാമം ധന്യമേ