നരകാഗ്നിയിൽ നാമെരിയാതെ
ചിരകാലം നാം വലയാതെ
പരഗതി നമ്മൾക്കരുളാനായ്
പരമസുതൻ വന്നിഹ നരനായ്

ആത്മവിശപ്പിനു വിരുന്നും വൻ
പാപവിഷത്തിനു മരുന്നും താൻ
തീരാവിനകൾ തീർക്കുമവൻ
ധാരാളം കൃപ നൽകുമവൻ

കുരിശിൽ ചിന്തിയ തൻചോര -
യ്ക്കൊരു നികരുണ്ടോയിനി വേറെ
തിരുനാമം പോലൊരു നാമം
തരുമോ ശാശ്വത വിശ്രാമം?

ഇതുപോലിനിയാർ സ്നേഹിപ്പാൻ
ഇതുപോലാരിനി സേവിപ്പാൻ
അനുദിനം നമ്മെ പാലിപ്പാൻ
ആരുണ്ടിതുപോൽ വല്ലഭനായ്?

ഗുരുവരനേശുവിന്നരികിൽ വരു -
മ്പൊഴുതാനന്ദം പരമാനന്ദം
തിരനിര തീർന്നിനിയക്കരെ നാട്ടിൽ
ചേരുമ്പോഴെന്താനന്ദം!