ഉലകത്തിൻ പാപത്തെ നീക്കുവാൻ
ഉടലെടുത്തൂഴിയിൽ വന്നവൻ
ഉയിർ തന്നവൻ മൂന്നാം ദിനം
ഉയിർത്തെഴുന്നു വാനിൽ ചെന്നവൻ

എന്നുമുളളവൻ സർവ്വവല്ലഭൻ
മണ്ണും വിണ്ണുമെല്ലാമുണ്ടാക്കിയോൻ
ഉന്നതാധിപൻ ഹീന പാപിയാ -
മെന്നെത്തേടിവന്നതത്ഭുതം

വഴി സത്യം ജീവനുമായവൻ
വഴി പിശകാതെ നടത്തിടും
പൊഴിയും സദാ കൃപ മാരിപോൽ തേൻ -
മൊഴികൾ തൂകി താങ്ങിടും

പാപഭാരം പേറി വലഞ്ഞിനി
ശാപത്തീയിൽ വീണെരിയാതെ നാം
കൃപയേറിടും ക്രിസ്തുവേശുവിൻ
കുരിശിൽ വിശ്രാമം നേടിടാം